قال المهندس سامح بسيوني الكاتب المتخصص في الشئون التربوية إن العبارات التربوية التي كانت تُردد على أسماع الأبناء من الآباء والأمهات بلا ملل؛ كانت تُنحت في القلوب وتَثبت في العقول قبل أن تظهر في السلوك وساهمت في تكوين مجتمع أفضل، متسائلًا: أين الآباء والأمهات الآن من استمرارية ترديد هذه العبارات التربوية.
وأضاف الكاتب في منشور له على فيس بوك: أين السلوك العملي للآباء والأمهات المعزز لهذه النصائح عند أبناءهم في هذه الأوقات..
وأشار الكاتب إلى أنه من أمثلة تلك العبارات التي قرعت أذننا في صغرنا من أباءنا وأمهاتنا رحمهم الله فتركت أثرًا واضحًا في سلوكيات الأجيال السابقة ما يلي:
- إعمل الحاجة دي علشان ربنا يحبك
- فرض ربنا الأول قبل أي حاجة
- دا حرام ويغضب ربنا يا بني
- ربنا كريم، فإوعى تمنع خيرك عن غيرك
- روح ياإبني/ يا بنتي ربنا يرضى عنك
- اللي فيها لله ما بتغرقش
- اسمها "حضرتك" مش "انت"
- اسمها "نعم" مش "ايه"
- وطي صوتك
- ماتحطش رجل على رجل قدام حد كبير
- ماتبقاش قاعد و سايب حد كبير واقف
- اقف بعيد عن الباب لما تخبط
- متتصلش بحد متأخر
- اقعد على الكرسي اللي مش كاشف البيت
- ماتزعلش حد في بيتك
- خبط على باب الأوضة قبل ما تفتحه
- سم الله، وكل من نحيتك و ابعد الطبق عنك شويه.
- قوم أول واحد من على الاكل لو معزوم
- استنى كلهم يقوموا لو انت اللي عازم
- متزورش حد فجأة بدون معاد
- تدخل بيت حد تبقى اعمى و تطلع اخرس
- في بيت غريب تقعد مطرح ما يتقالك، وماتقومش من مكانك غير لما حد يقولك
- اقفلي رجلك و انت قاعدة
- افرد ضهرك و انت قاعد
- انزل مع اختك ما تمشيش لوحدها
- خدي بالك من اخوكي
- سيب الزفت التلفزيون ده يا تنام يا تذاكر يا تشوف لك حاجة تنفعك ..
- تعال رايحين نعيد على قرايبنا
- روحي ودي دي لجارتنا و قولها ماما بتسلم عليكي
- شيل من عمو الأكياس دي
- قوم خلي طنط تقعد
- ماتطلعش ورا بنت السلم؛ يا تطلع قدامها يا تستنى شويه و تطلع.
- لو حد طالع وراكي اقفي في كورنر السلم عديه و بعدين اطلعي.
- انت مش احسن من حد ولا حد احسن منك، فـ ما تقارنش نفسك بحد.
- قول شكرًا لو حد عملك خدمة
- قول اسف واعتذر لو غلطت، اللي بيعتذر مش ضعيف دا قوي
- ما تشدش حاجه من ايد حد
- ما تسبقش حد كبير و انت ماشي
- افتح الباب للكبير .
- الباب المقفول تخبط عليه حتى لو متخيل ان مافيش حد.
- قول الحق ولو على رقبتك.
- لبس النادي ده مينفعش يتخرج بيه.
- لبس البيت غير لبس النوم.
- عيب دا أكبر منك.
- بطل دوشة الناس نايمة
- متخليهمش يدفعوا .. ادفع انت انت الراجل.
- مترميش حاجه في الشارع
- نضف مكان مبهدلت
- متجيش ناحيتها دي أمانة عندنا