شرح الدكتور محمد سعد الأزهري، الخبير الأسري والتربوي، الطريقة الصحيحة التي يجب أن يتعامل بها الأبوين مع أولادهم عندما يرتكبون الخطأ أو يتعرضون إلى الفتنة، موضحا أن محطات الأمان هي الطريقة الأمثل لمنع حدوث مثل هذه الأمور.
وأضاف الأزهري في منشور له عبر "فيس بوك" قائلا: ممكن تربي ابنك أو بنتك بشكل جيد جداً، وبعدين تفاجأ إن ابنك بيشرب مخدرات وبنتك ليها علاقة مع ولد!.
وأوضح الأزهري أن هذه أسمها فتنة تمت وترعرت داخل أولادك وانت مش شايفها بعينك، ومفيش حد كبير على الفتنة، متسائلا: هل ممكن الولاد يرجعوا بسرعة للصح؟!.
وأجاب الخبير الأسري والتربوي على سؤاله قائلا: نعم ممكن يرجعوا بسرعة، ويبقى اللي حصل ده عبارة عن دروب مر بيهم وعدى على خير، موضحا أن المطلوب عموماً حتى نحافظ على اولادنا هو الاهتمام الشديد بعمل محطات الأمان لأولادك!.
وبين الأزهري أن المقصود بمحطات الأمان مع الأبناء، هو أن تحاول مع أولادك إنك تطمنهم بإن الصراحة بينكم هي مفتاح عدم العقاب أو عدم التلاوم، يعني خليك صريح معايا هتلاقيني واقف جنبك ومهتم بحل مشكلتك مش بعقابك ولا بلومك!، موضحا أن هذه اسمها محطة أمان لأولادك.
وأوضح الأزهري أن الهدف من محطات الأمان هي: لما ابنك يتوه أو البنت تحس إنها تايهة إنهم يرجعوا لمحطة من محطات الأمان، محطة الأب اللي أول حاجة هيعملها هيحضن أولاده مش هيضربهم، هيسمعهم مش هيطردهم، هيساعدهم مش هيبكّتهم!
واختتم الأزهري قائلا: إذاً محطات الأمان هي الوالدين مش الصحاب ولا الجيران ولا غيرهم، ساعتها أسرتك هترجعلك ومش هتبعد عنك، وأي دروب هيحصل لحد فيهم هيلفوا يلفوا ويرجعولك مرة تانية بإذن الله.