من بداية الثورة والجزيرة دايما بتقف معانا وكان ليها عامل كبير جدا في نجاح الثورة ورحيل مبارك
ودلوقتي الجزيرة واقفة ضد عزل الرئيس مرسي بقوة وليها الدور الاكبر في التغطية الاعلامية وتوصيل صوت المظاهرات للعالم
صحيح الجزيرة لو قارناها بالاعلام المصري سواء الحكومي او الخاص هنلاقي فرق كبير جدا في الحرفية والمهنية الاعلامية . . بس في نفس الوقت لازم ده ميخلناش ننسي نسأل نفسنا ...... هي الجزيرة واقفة معانا ليه ؟ !
لو قولنا ان الجزيرة قناة محايدة وبتحب تحافظ علي المهنية و تنقل كل الاخبار والاحداث . . تلاقي مباشرة سؤال بيرن في ذهنك ... امال الاخبار الخاصة بالخليج ومشاكله بتروح فين . . ولا هو مفيش مشاكل ولا ازمات غير في الدول العربية التانية والخليج و سكانه معندهمش مشاكل و عايشين في المدينة الفاضلة ؟
صحيح الوضع في الخليج احسن بكتير مقارنة بباقي الدول العربية .. بس في نفس الوقت في مشاكل كتير القناة مش بتتكلم عنها – او بتتكلم عنها باستحياء شديد – زي مثلا توزيع الثروة وتوريث الحكم والتعامل مع العمالة الاجنبية ...الخ
كمان لو كانت الجزيرة بتدعم ثورات الربيع العربي من باب ان حكام الدول دي حكام فشلة او عملاء او منبطحين .. فغريب جدا تخليها عن المعارضة ومظاهراتها في السعودية وعمان والبحرين والكويت ..الخ
رفض الجزيرة الصريح للي حصل في مصر – وانا كمان رافضه شكلا وموضوعا - يخليك تستغرب جدا لان امير قطر (حمد بن بن خليفة) استولي علي الحكم بعد الانقلاب علي ابيه عام 1995 ونفس الموضوع بالنسبة للسلطان قابوس في عمان ... وعمرنا ما سمعنا ولا مرة الجزيرة لما بتذكر اسمهم بتسميهم سلطات الانقلاب ولا حتي بتجيب سيرة الانقلاب من اساسه !
تدعيم الجزيرة للاسلاميين يخليك في قمة الاستغراب ... قطر اللي عاملة علاقات ديبلوماسية مع اسرائيل وهي مش من دول الجوار ولا في احتمال لحدوث حرب بينها وبين اسرائيل ... قطر اللي فيها واحدة من اكبر القواعد الامريكية في العالم ... اللي وصلت لتنظيم كاس العالم بالرشوة والفساد . . اللي انفقت المليارات في افتتاح دورة الالعاب الاسوية في اسراف وبذخ لم يحدث من اغني دول العالم ... واللي الامير بتاعها عمل انقلاب علي ابيه ونفاه بره بلده !
مصداقية القناة ورغم تفوقها بمراحل علي كل القنوات العربية الاخري تظل علامة استفهام كبيرة . .
ميدان التحرير كان بيشيل ملايين ايام الثورة علي مبارك وفي 30 – 6 بقي بيشيل 200 الف وبالشوارع الجانبية يصل علي اقصي تقدير لنصف مليون طبقا لتقرير الجزيرة اللي مستند علي الحسابات الدقيقة لمساحة التحرير ( وهو ده التعداد الادق فعلا )
الموضوع ده مش مجرد خطأ او تضارب عادي .. ده بيدل علي انت مصلحتك ايه في الصراع ده ونفسك مين يكسب . . وعشان كده بتحاول توجه الخبر في الاتجاه اللي يخدم مصالحك واهدافك . . وتعتمد علي الاحصاء الجذافي في المرة الاولي وعلي الاحصاء العلمي الدقيق في المرة التانية . . المهم الاحصاء يطلع في المرتين يخدم الطرف اللي انت بتدعمه !
انحيازك لطرف معين مهما حاولت تخبيه هيبان في حاجات كتير . . تسليط الضوء علي اخبار بعينها وفرد مساحات اعلامية كبيرة ليها من مناظرات وحوارات وتقارير واتصالات . . واحيانا تكرار الخبر لاكثر من يوم علي شريط الاخبار . . وربما تجد النشرة الاخبارية تبدأ بخبر عادي لا يستحق الاهتمام اصلا . . بينما يتم اغفال اخبار اخري او المرور عليها مرور الكرام لذر الرماد في العيون ولادعاء الحيادية !
المقصود من كل الكلام ده ان اكيد الجزيرة مقارنة بكل القنوات العربية الاخري هي الاكثر حيادية ومصداقية والاعلي مهنية (لان طبعا في قنوات منحازة انحياز مستفز .. وفي قنوات متعرفش يعني ايه الرأي الثاني اساسا ... وفي قنوات متخصصة في الكذب والتلفيق والاشاعات لا اكثر )
بس في نفس الوقت الهالة المقدسة اللي بيعملها البعض حول القناة مرفوضة تماما وهتضر اكثر ما هتفيد . .
وكونك تستفيد من انحياز الجزيرة ليك امر مش مرفوض طالما بيخدم مصالحك واهدافك مرحليا .. بس اللي مطلوب انك تستفيد من الدعم ده وانت عارف كويس انه مش لله وان ليه اغراض واهداف خاصة . . وانك متقعدش تمجد قوي في مهنيتها وحياديتها عشان لو جات وانقلبت عليك بعد كده مش هينفع تشتكي . . ولو شكيت مش هتلاقي اللي يسمعلك !
طبعا كل واحد دلوقتي بيقول طيب هي الجزيرة بتعمل كده ليه اساسا وايه هي اهدافها واغراضها الخاصة ... اسيب انا الموضوع ده لفكر كل واحد و اجتهاده . . عشان ده عايزله بحث لوحده
